پرانے اینڈرائیڈ فونز پر واٹس ایپ بند، 9 ستمبر سے سپورٹ ختم ہونے کا امکان
واٹس ایپ صارفین کے لیے اہم خبر سامنے آگئی ہے، کیونکہ پرانے اینڈرائیڈ آپریٹنگ سسٹم پر چلنے والے متعدد اسمارٹ فونز پر میسجنگ ایپ کی سپورٹ ختم کی جا رہی ہے۔ ایسے صارفین جو کئی سال پرانا اینڈرائیڈ فون استعمال کر رہے ہیں، انہیں واٹس ایپ کے استعمال میں مشکلات کا سامنا ہوسکتا ہے۔
رپورٹ کے مطابق میٹا کی جانب سے اینڈرائیڈ 6 سے پہلے کے آپریٹنگ سسٹم ورژنز پر چلنے والے فونز کے لیے واٹس ایپ سپورٹ ختم کرنے کا فیصلہ کیا گیا ہے۔ اس فیصلے کے بعد خاص طور پر اینڈرائیڈ 5 اور اینڈرائیڈ 5.1 پر کام کرنے والے اسمارٹ فونز متاثر ہوں گے۔
واٹس ایپ کی جانب سے وقتاً فوقتاً پرانے آپریٹنگ سسٹمز کے لیے سپورٹ ختم کی جاتی ہے تاکہ ایپ کو جدید فیچرز، بہتر سکیورٹی اور پرائیویسی کے تقاضوں کے مطابق برقرار رکھا جاسکے۔ کمپنی کی جانب سے مصنوعی ذہانت سمیت متعدد جدید فیچرز متعارف کرائے جا رہے ہیں، جن کے لیے نسبتاً جدید ہارڈویئر اور آپریٹنگ سسٹم درکار ہوتا ہے۔
رپورٹ میں بتایا گیا ہے کہ 8 ستمبر 2026 کے بعد اینڈرائیڈ 6 سے پہلے کے آپریٹنگ سسٹمز پر چلنے والے فونز میں واٹس ایپ کی رسائی ختم ہوسکتی ہے، جس کے باعث ان ڈیوائسز پر موجود صارفین ایپ کو معمول کے مطابق استعمال نہیں کر سکیں گے۔
اس تبدیلی سے بچنے کے لیے ایسے صارفین کو مشورہ دیا گیا ہے کہ وہ اپنے واٹس ایپ اکاؤنٹ اور اہم ڈیٹا کو کسی ایسے نئے فون میں منتقل کرلیں جو اینڈرائیڈ 6 یا اس کے بعد کے ورژن پر چلتا ہو۔
صارفین کے لیے سب سے اہم بات یہ ہے کہ فون تبدیل کرنے سے پہلے اپنی چیٹس اور میڈیا کا بیک اپ ضرور بنائیں اور واٹس ایپ ڈیٹا کو نئی ڈیوائس پر منتقل کریں۔ بصورت دیگر پرانی ڈیوائس پر موجود چیٹ ہسٹری اور میڈیا تک رسائی متاثر ہوسکتی ہے۔
واٹس ایپ کی جانب سے پرانے آپریٹنگ سسٹمز کی سپورٹ ختم کرنے کی بنیادی وجوہات میں سکیورٹی کو بہتر بنانا، صارفین کی پرائیویسی کا تحفظ اور ایپ کی مجموعی کارکردگی کو مستحکم رکھنا شامل ہے۔
لہٰذا اگر کسی صارف کا فون اینڈرائیڈ 6 سے پہلے کے ورژن پر چل رہا ہے تو اسے اپنے فون کا آپریٹنگ سسٹم چیک کرنا چاہیے اور ضرورت پڑنے پر نئی ڈیوائس پر منتقل ہونے سے قبل واٹس ایپ ڈیٹا کا بیک اپ محفوظ کرلینا چاہیے۔
