چیٹ جی پی ٹی میں نیا فیچر متعارف، اب تحریری ہدایات یا تصویر سے متحرک GIF بنانا ممکن
دنیا کے مقبول ترین مصنوعی ذہانت کے چیٹ بوٹ چیٹ جی پی ٹی میں نیا فیچر متعارف کرا دیا گیا ہے، جس کے ذریعے صارفین تحریری ہدایات یا اپنی اپ لوڈ کردہ تصاویر کی مدد سے متحرک GIF تیار کر سکیں گے۔
اوپن اے آئی نے چیٹ جی پی ٹی کے لیے نیا امیج جنریشن ماڈل ChatGPT Images 2.6 متعارف کرایا ہے، جو ساکت تصاویر کو متحرک GIF میں تبدیل کرنے کی سہولت فراہم کرتا ہے۔
اس فیچر کے ذریعے صارفین اپنی پسند کی تصویر اپ لوڈ کرکے تحریری ہدایات دے سکتے ہیں کہ وہ تصویر میں کس قسم کی حرکت دیکھنا چاہتے ہیں۔ چیٹ جی پی ٹی ان ہدایات کے مطابق متحرک GIF تیار کر دے گا۔
صارفین بغیر کسی تصویر کے بھی صرف اپنے ذہن میں موجود منظر کی وضاحت کرکے GIF بنا سکتے ہیں۔ اس کے علاوہ تیار کردہ GIF کی پلے بیک اسپیڈ تبدیل کرنے، اس میں ترمیم کرنے اور اسے شیئر کرنے کی سہولت بھی دستیاب ہے۔
اوپن اے آئی کے مطابق نیا امیج جنریشن ماڈل سابقہ ماڈل کے مقابلے میں 50 فیصد زیادہ تیزی سے تصاویر تیار کر سکتا ہے اور تصاویر میں باریک تفصیلات برقرار رکھنے کی صلاحیت بھی بہتر بنائی گئی ہے۔
یہ فیچر دنیا بھر میں چیٹ جی پی ٹی کے تمام سبسکرپشن ٹیئرز کے لیے متعارف کرایا جا رہا ہے، تاہم GIF بنانے کی سہولت مرحلہ وار صارفین تک پہنچائی جا رہی ہے۔
اس پیش رفت سے صارفین کو مختصر اینیمیٹڈ تصاویر، سوشل میڈیا ری ایکشنز، میمز اور تخلیقی مواد تیار کرنے میں مزید آسانی ہوگی۔
