ایونٹ سے ایک دن پہلے آئی فون 18 پرو ماڈلز کا ڈیزائن لیک
ایپل کے نئے آئی فون 18 پرو ماڈلز 9 ستمبر کو متعارف کرائے جانے کا امکان ہے، جبکہ ایونٹ سے ایک روز قبل فونز کے ڈیزائن کی مبینہ فوٹیج سامنے آگئی ہے۔
کیلیفورنیا: ٹیکنالوجی کمپنی ایپل کی جانب سے آئی فون 18 سیریز کے نئے ماڈلز 9 ستمبر کو متعارف کرانے کی تیاریاں کی جا رہی ہیں، تاہم لانچ سے ایک روز قبل آئی فون 18 پرو اور آئی فون 18 پرو میکس کے ڈیزائن کی مبینہ فوٹیج سامنے آگئی ہے۔
رپورٹس کے مطابق اس سال ایپل کے ایونٹ میں اسٹینڈرڈ آئی فون 18 اور آئی فون 18 ایئر 2 متعارف نہیں کرائے جائیں گے۔ اس کے بجائے کمپنی آئی فون 18 پرو، آئی فون 18 پرو میکس اور اپنے پہلے فولڈ ایبل آئی فون کو پیش کرنے کی تیاری کر رہی ہے۔
سامنے آنے والی مبینہ فوٹیج سے اندازہ ہوتا ہے کہ آئی فون 18 پرو اور آئی فون 18 پرو میکس چار مختلف رنگوں میں دستیاب ہوں گے۔ ان رنگوں میں ڈارک چیری، بلیک، اسکائی بلیو اور سلور شامل ہیں۔
ڈیزائن کے حوالے سے نئے پرو ماڈلز گزشتہ سال متعارف کرائے گئے آئی فون 17 پرو سیریز سے کافی حد تک ملتے جلتے دکھائی دیتے ہیں۔ تاہم فونز میں کیمرا سسٹم کو نمایاں طور پر اپ گریڈ کیے جانے کی اطلاعات ہیں۔
رپورٹس کے مطابق آئی فون 18 پرو اور آئی فون 18 پرو میکس کے بیک پر موجود مین کیمرا ویری ایبل اپرچر ٹیکنالوجی سے لیس ہوگا۔ اس ٹیکنالوجی کے ذریعے صارفین کو فوٹوگرافی کے دوران روشنی اور دیگر کیمرا سیٹنگز پر زیادہ کنٹرول ملنے کی توقع ہے۔
دونوں پرو ماڈلز میں ایپل کا نیا A20 Pro پراسیسر اور نیا موڈیم استعمال کیے جانے کی اطلاعات ہیں۔ اس کے علاوہ بیٹری کی گنجائش بھی گزشتہ نسل کے مقابلے میں زیادہ ہونے کا امکان ہے، جس سے بیٹری لائف میں بہتری آسکتی ہے۔
قیمت کے حوالے سے بھی آئی فون 18 سیریز سے متعلق مختلف دعوے سامنے آ رہے ہیں۔ رپورٹس کے مطابق آئی فون 18 پرو کی ابتدائی قیمت تقریباً 1099 ڈالر ہو سکتی ہے، جو پاکستانی کرنسی میں 3 لاکھ روپے سے زائد بنتی ہے۔
اس سے قبل بعض رپورٹس میں دعویٰ کیا گیا تھا کہ ایپل نئے آئی فون ماڈلز کی قیمتوں میں کم از کم 100 ڈالر تک اضافہ کر سکتا ہے، تاہم حتمی قیمت کا اعلان کمپنی کی جانب سے لانچ ایونٹ کے دوران کیا جائے گا۔
دوسری جانب ایپل کا پہلا فولڈ ایبل آئی فون بھی اس ایونٹ کی اہم ترین پیشکشوں میں شامل ہوگا۔ رپورٹس کے مطابق اس ڈیوائس کی قیمت 2 ہزار ڈالر سے زیادہ ہونے کا امکان ہے، جس کے باعث نئی آئی فون سیریز ایپل کی تاریخ کی مہنگی ترین فلیگ شپ لائن اپ میں شامل ہو سکتی ہے۔
تاہم ان تمام تفصیلات، خصوصاً ڈیزائن، قیمت اور فیچرز کی حتمی تصدیق ایپل کے باضابطہ لانچ ایونٹ کے بعد ہی ہو سکے گی۔
