گوگل کروم میں پی ڈی ایف فائلز کا ترجمہ کرنا اب ہوگا آسان
گوگل کروم صارفین کے لیے ایک نئے فیچر کی آزمائش شروع کردی گئی ہے، جس کے ذریعے براؤزر میں موجود پی ڈی ایف فائلز کا مختلف زبانوں میں ترجمہ کرنا آسان ہوجائے گا۔
رپورٹ کے مطابق گوگل نے کروم کے Canary ورژن میں پی ڈی ایف ٹرانسلیشن فیچر کی آزمائش شروع کی ہے۔ اس فیچر کے ذریعے صارفین براہ راست کروم براؤزر میں موجود پی ڈی ایف فائل کے متن کو دوسری زبان میں ترجمہ کرسکیں گے، جس سے الگ سے ترجمہ کرنے والے ٹولز یا ویب سائٹس استعمال کرنے کی ضرورت کم ہوجائے گی۔
رپورٹ میں بتایا گیا ہے کہ نئے فیچر کے حوالے سے تمام ڈیسک ٹاپ آپریٹنگ سسٹمز کا ذکر موجود ہے، تاہم فی الحال یہ سہولت عام صارفین کے لیے فعال نہیں کی گئی۔
گوگل کی جانب سے ابھی یہ واضح نہیں کیا گیا کہ پی ڈی ایف فائلز کے ترجمے کی یہ سہولت کروم کے مستحکم ورژن میں کب تک دستیاب ہوگی۔ فی الحال عام صارفین کو کروم میں پی ڈی ایف فائلز کا براہ راست ترجمہ کرنے کی سہولت حاصل نہیں ہے۔
نئے فیچر کی باقاعدہ دستیابی کے بعد صارفین کے لیے غیر ملکی زبانوں میں موجود پی ڈی ایف دستاویزات کو سمجھنا مزید آسان ہوجائے گا، خصوصاً ان افراد کے لیے جو مختلف زبانوں میں تحقیقی، تعلیمی یا دفتری دستاویزات کا مطالعہ کرتے ہیں۔
