مریم نواز کی ڈی سی صاحبان کو ہسپتالوں کی صورتحال بہتر بنانے کے لیے 3 دن کی مہلت

لاہور: وزیراعلیٰ پنجاب مریم نواز نے صوبے بھر کے ڈپٹی کمشنرز کو سرکاری ہسپتالوں کی صورتحال بہتر بنانے کے لیے تین دن کی مہلت دے دی اور واضح کیا ہے کہ عوام کو صحت کی سہولیات کی فراہمی میں غفلت برداشت نہیں کی جائے گی۔

وزیراعلیٰ پنجاب کی زیر صدارت ڈپٹی کمشنرز کی کارکردگی کا جائزہ لینے کے لیے اجلاس منعقد ہوا، جس میں ضلعی انتظامیہ کی کارکردگی اور عوامی سہولیات کی صورتحال کا جائزہ لیا گیا۔ اجلاس کے دوران مریم نواز نے ڈپٹی کمشنرز کو ہدایت کی کہ وہ اپنے اپنے اضلاع میں ہسپتالوں کی حالت بہتر بنانے کے لیے فوری اقدامات کریں اور تین دن کے اندر واضح بہتری یقینی بنائیں۔

اجلاس میں وزیراعلیٰ نے فصلوں کی باقیات جلانے کے واقعات پر بھی تشویش کا اظہار کرتے ہوئے اس عمل پر 100 فیصد کنٹرول یقینی بنانے کا حکم دیا۔ انہوں نے متعلقہ افسران کو ہدایت کی کہ فصلوں کی باقیات جلانے کی روک تھام کے لیے مؤثر اقدامات کیے جائیں تاکہ اسموگ اور فضائی آلودگی کے مسائل پر قابو پایا جاسکے۔

مریم نواز نے شہری سہولیات سے متعلق ہدایات جاری کرتے ہوئے سٹریٹ لائٹس اور مین ہولز کو بھی 100 فیصد فعال بنانے کا حکم دیا۔ ان کا کہنا تھا کہ ضلعی انتظامیہ عوامی مسائل کے حل کے لیے اپنی ذمہ داریاں پوری کرے اور بنیادی سہولیات کی فراہمی میں کسی قسم کی کوتاہی نہ برتے۔

وزیراعلیٰ پنجاب نے اجلاس کے دوران ڈپٹی کمشنرز کی کارکردگی پر بات کرتے ہوئے کہا کہ افسران کی غفلت سے ان کی ساکھ متاثر ہوتی ہے۔ انہوں نے زور دیا کہ ضلعی انتظامیہ اپنی کارکردگی بہتر بنائے اور عوام کو درپیش مسائل کے حل کے لیے عملی اقدامات کرے۔

اجلاس میں جاری کردہ ہدایات کے مطابق ہسپتالوں کی بہتری، فصلوں کی باقیات جلانے کی روک تھام اور شہری سہولیات کی بحالی کو ضلعی انتظامیہ کی ترجیحات میں شامل کیا گیا ہے۔ ڈپٹی کمشنرز کو ان امور پر فوری عمل درآمد یقینی بنانے کی ہدایت کی گئی ہے۔