ملک میں سونے کی قیمت میں مسلسل چوتھے روز اضافہ
ملک میں سونے کی قیمت میں مسلسل چوتھے روز بھی اضافہ ریکارڈ کیا گیا ہے، جس کے بعد 24 کیرٹ سونے کی فی تولہ قیمت نئی بلند سطح پر پہنچ گئی۔
آل پاکستان صرافہ ایسوسی ایشن کے مطابق آج 24 کیرٹ سونے کی فی تولہ قیمت میں 2 ہزار 200 روپے کا اضافہ ہوا، جس کے بعد سونے کی قیمت 4 لاکھ 56 ہزار 536 روپے فی تولہ ہوگئی۔
صرافہ مارکیٹ کے تازہ اعداد و شمار کے مطابق 10 گرام سونے کی قیمت میں بھی اضافہ ریکارڈ کیا گیا۔ 10 گرام سونے کی قیمت ایک ہزار 887 روپے بڑھ کر 3 لاکھ 91 ہزار 406 روپے ہوگئی ہے۔
اعداد و شمار کے مطابق ملک میں گزشتہ چار روز کے دوران سونے کی قیمت میں مجموعی طور پر 28 ہزار 600 روپے فی تولہ کا نمایاں اضافہ ہوچکا ہے۔ اس سے قبل گزشتہ تین روز میں بھی سونے کی فی تولہ قیمت میں 26 ہزار 400 روپے کا اضافہ ریکارڈ کیا گیا تھا، جس کے باعث مقامی مارکیٹ میں سونے کی قیمت مسلسل اضافے کی جانب گامزن ہے۔
دوسری جانب چاندی کی قیمت میں کمی دیکھنے میں آئی ہے۔ صرافہ ایسوسی ایشن کے مطابق فی تولہ چاندی کی قیمت میں 113 روپے کی کمی ہوئی، جس کے بعد چاندی کی فی تولہ قیمت 6 ہزار 826 روپے ہوگئی۔
عالمی مارکیٹ میں بھی سونے کی قیمت میں نمایاں اضافہ ریکارڈ کیا گیا۔ عالمی مارکیٹ میں فی اونس سونے کی قیمت 22 ڈالر اضافے کے بعد 4 ہزار 341 ڈالر ہوگئی ہے۔
ماہرین کے مطابق عالمی مارکیٹ میں سونے کی قیمت میں ہونے والی تبدیلیوں کا براہ راست اثر پاکستان کی مقامی صرافہ مارکیٹ پر پڑتا ہے۔ عالمی قیمت، ڈالر کی قدر اور مقامی طلب و رسد جیسے عوامل سونے کے نرخوں کے تعین میں اہم کردار ادا کرتے ہیں۔
سونے کی قیمت میں مسلسل اضافے کے باعث زیورات خریدنے والے شہریوں کے اخراجات میں بھی اضافہ ہوگیا ہے، جبکہ سرمایہ کار عالمی اور مقامی مارکیٹ میں سونے کے نرخوں پر گہری نظر رکھے ہوئے ہیں۔
