عالمی منڈی میں خام تیل سستا، روس سے رسد بڑھنے کی توقعات
عالمی منڈی میں خام تیل کی قیمتوں میں نمایاں کمی ریکارڈ کی گئی ہے، جس کی بڑی وجوہات روس اور یوکرین کے درمیان توانائی تنصیبات پر حملے روکنے کے معاہدے کی اطلاعات اور روس سے تیل کی رسد بڑھنے کی توقعات ہیں۔
رپورٹس کے مطابق عالمی تجارت کے دوران برینٹ خام تیل کی قیمت میں ایک ڈالر 37 سینٹ، یعنی 1.31 فیصد کمی ہوئی، جس کے بعد اس کی قیمت 103.35 ڈالر فی بیرل ہوگئی۔
اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت میں بھی ایک ڈالر 30 سینٹ، یعنی 1.42 فیصد کمی ریکارڈ کی گئی، جس کے بعد قیمت 90.55 ڈالر فی بیرل پر آگئی۔
عالمی منڈی میں تیل کی قیمتوں میں کمی کی ایک اہم وجہ روس سے تیل کی فراہمی میں اضافے کی توقعات ہیں۔ امریکی صدر ڈونلڈ ٹرمپ کے بیان کے مطابق روس اور یوکرین نے ایک دوسرے کی اہم توانائی تنصیبات پر حملے روکنے پر اتفاق کیا ہے۔
توانائی کی تنصیبات پر حملوں میں کمی اور تیل کی رسد میں ممکنہ اضافے سے عالمی منڈی میں سپلائی بہتر ہونے کی توقع کی جا رہی ہے، جس کے باعث خام تیل کی قیمتوں پر دباؤ دیکھا گیا ہے۔
عالمی منڈی میں تیل کی قیمتوں میں یہ کمی تیل درآمد کرنے والے ممالک کے لیے اہم ہے، تاہم پاکستان میں پیٹرولیم مصنوعات کی قیمتوں پر اس کے اثرات کا انحصار عالمی قیمتوں کے تسلسل، ڈالر کے مقابلے میں روپے کی قدر اور حکومتی قیمتوں کے تعین پر ہوگا۔
