کراچی: آبنائے ہرمز سے گزرنے والا پہلا پاکستانی جہاز ’ایم ٹی کراچی‘ ملکی حدود میں داخل
کراچی:ویب ڈیسک
آبنائے ہرمز سے گزرنے والا پہلا پاکستانی بحری جہاز ایم ٹی کراچی خلیج عمان سے بحیرہ عرب میں داخل ہو گیا ہے۔ حکام کے مطابق یہ جہاز 18 مارچ کو کراچی کی بندرگاہ پر لنگر انداز ہوگا، جہاں اسے ویلکم کرایا جائے گا اور سمندری رسد کی تمام ضروریات مکمل کی جائیں گی۔
ایم ٹی کراچی میں 8 کروڑ لیٹر خام تیل موجود ہے اور اسے آبنائے ہرمز سے گزرنے کے لیے ایرانی حکام کی جانب سے خصوصی اجازت دی گئی تھی۔ جہاز نے ایرانی سمندری حدود استعمال کیں جبکہ پاکستان نیوی نے پورے سفر کے دوران مکمل سمندری تحفظ فراہم کیا، تاکہ کسی بھی ممکنہ خطرے سے بچا جا سکے۔
ذرائع کے مطابق خام تیل کی ادائیگی چینی کرنسی میں کی گئی ہے، جس سے دونوں ممالک کے درمیان تجارتی تعلقات اور سمندری راستوں میں اعتماد مضبوط ہوتا ہے۔ حکام کا کہنا ہے کہ یہ پہلا پاکستانی بحری جہاز ہے جو آبنائے ہرمز سے گزرا ہے، اور یہ پاکستان کی سمندری نقل و حمل میں خودمختاری اور سکیورٹی کی کامیابی کی علامت ہے۔
ایم ٹی کراچی کے اس سفر نے پاکستان کے سمندری راستوں میں محفوظ نقل و حمل اور بین الاقوامی تجارتی تعلقات کے فروغ میں اہم کردار ادا کیا ہے۔ پاکستان نیوی کے اہلکاروں نے جہاز کے ہر لمحے کی نگرانی کی اور اسے ملکی حدود تک محفوظ پہنچایا۔
