ملک کو متبادل قیادت کی ضرورت ہے، بیرسٹر سیف
خیبرپختونخوا کے سابق مشیر اطلاعات بیرسٹر سیف نے کہا ہے کہ پاکستان کو موجودہ حکومت اور اپوزیشن دونوں کے متبادل کے طور پر نئی سیاسی قیادت کی ضرورت ہے۔
اپنے بیان میں بیرسٹر سیف نے کہا کہ اپوزیشن ملک میں مؤثر کردار ادا کرنے میں ناکام نظر آ رہی ہے، جس کے باعث سیاسی بحران اور ڈیڈ لاک مزید گہرا ہو رہا ہے۔ انہوں نے زور دیا کہ موجودہ سیاسی صورتحال سے نکلنے کے لیے قومی مکالمہ ناگزیر ہو چکا ہے۔
انہوں نے بتایا کہ آج کراچی میں نیشنل ڈائیلاگ کمیٹی کے زیر اہتمام ایک تقریب منعقد ہوگی، جس میں مختلف حلقوں سے تعلق رکھنے والے افراد شرکت کریں گے۔ ان کا کہنا تھا کہ عوامی مفاد کے لیے سیاسی اور ذاتی اختلافات کو پسِ پشت ڈالنا ہوگا۔
بیرسٹر سیف نے مزید کہا کہ قومی مسائل کا حل صرف مذاکرات، سیاسی ہم آہنگی اور باہمی تعاون کے ذریعے ہی ممکن ہے۔ ان کے مطابق ملک کو سیاسی استحکام کی جانب لے جانے کے لیے تمام اسٹیک ہولڈرز کو سنجیدہ بات چیت کا آغاز کرنا چاہیے۔
سیاسی تجزیہ کاروں کے مطابق بیرسٹر سیف کا بیان ملک میں جاری سیاسی کشیدگی اور حکومت و اپوزیشن کے درمیان بڑھتے ہوئے فاصلے کی عکاسی کرتا ہے۔
