شارجہ میں سرکاری ملازمین کی کم از کم آمدن 20 ہزار درہم مقرر
شارجہ میں سرکاری ملازمین کے لیے کم از کم آمدن 20 ہزار درہم مقرر کردی گئی ہے، جبکہ تنخواہوں میں اضافے کا اطلاق رواں ماہ ستمبر سے ہوگا۔
شارجہ کے حکمران شیخ ڈاکٹر سلطان بن محمد القاسمی نے سرکاری ملازمین کی تنخواہوں میں اضافے کا اعلان کرتے ہوئے کہا ہے کہ اس اقدام کا مقصد شہریوں کی مالی ضروریات پوری کرنا اور مہنگائی کے اثرات کو مدنظر رکھتے ہوئے ان کے معیار زندگی کو بہتر بنانا ہے۔
سرکاری اعلان کے مطابق تنخواہوں میں اضافے سے شارجہ کے 17 ہزار 776 سرکاری ملازمین مستفید ہوں گے۔ حکام کے مطابق کم از کم آمدن کا معیار بڑھانے سے ملازمین کو موجودہ معاشی حالات میں بہتر مالی سہولت حاصل ہوگی۔
اس کے علاوہ شارجہ میں سماجی امداد حاصل کرنے والے 6 ہزار 652 خاندانوں کے لیے بھی مالی سہولت میں اضافہ کیا گیا ہے۔ حکام کا کہنا ہے کہ معاشرے کے کم آمدن والے طبقے کی ضروریات کو پورا کرنے کے لیے مالی معاونت میں اضافہ کیا گیا۔
اعلان کے مطابق 2 ہزار 251 سرکاری ریٹائرڈ شہریوں کی کم از کم آمدن بھی بڑھا دی گئی ہے، جبکہ مزید 5 ہزار 300 ریٹائرڈ شہریوں کے لیے سپلیمنٹری گرانٹس میں بھی اضافہ کیا گیا ہے۔
حکام کے مطابق کم از کم آمدن میں اضافے کا فیصلہ شہریوں کی ضروریات اور موجودہ مہنگائی کو مدنظر رکھتے ہوئے کیا گیا ہے۔ اس اقدام سے سرکاری ملازمین، ریٹائرڈ افراد اور سماجی امداد حاصل کرنے والے خاندانوں کو براہ راست مالی فائدہ پہنچے گا۔
شیخ سلطان بن محمد القاسمی نے اماراتی شہریوں کو غیر ضروری قرض لینے سے گریز کرنے کی ترغیب بھی دی ہے۔ حکام کے مطابق شہریوں کو مالی طور پر مستحکم بنانے اور انہیں غیر ضروری مالی بوجھ سے بچانے کے لیے بھی اقدامات کیے جارہے ہیں۔
دوسری جانب والدین سے اپیل کی گئی ہے کہ وہ بچوں کے موبائل فونز اور دیگر الیکٹرانک آلات کے استعمال کو محدود رکھیں۔ حکام کے مطابق بچوں کی صحت مند خوراک، بہتر پرورش اور مجموعی فلاح و بہبود کے لیے سرکاری سطح پر سہولیات فراہم کی جارہی ہیں۔
شارجہ حکومت کا کہنا ہے کہ مالی معاونت اور آمدن میں اضافے کے اقدامات کا مقصد شہریوں کی بنیادی ضروریات پوری کرنے کے ساتھ ساتھ ان کے لیے بہتر اور مستحکم معاشی ماحول فراہم کرنا ہے۔
